اجمل ما قيل فى الغزل بالشعر الشعبي

الأربعاء نوفمبر 09, 2022 1:44 am

الشاعر علاء الدين احمد علي بشير :

خدودك زاهية بشوف في مقلك الجذابة
زينة الدنيا معني حياتي اتغذابا
حبك حل في جوفي وجيوشو غزابا
لو يرضيكي بعدك نعمة يحلو عذابا

الشاعر احمد حميدة :

عندي صبابة اصحابا وعقب اغبابا
والحب لحظة كان من العيون اسبابا
زعزعت الفؤاد خفقانو زي هبابة
والفكر اضطرب يضرب وتر في ربابة

الشاعر طه ود الشلهمة :

قربك بيهو اتغذي الجسم ويرتاح
وبعدك فقر دم هذا الكلام الصاح
وصفك يعجز الشعراء البيغنو فصاح
يا الشمس المعاك ضي الكواكب طاح

الشاعر الجيلي الكباشي :

تلاقيك بي فرح والفلجة وين ما تشوفا
عنقاً باهي مخروتة ومضمر جوفا
تقول مهر الصبق متحضرة ومكلوفة
وقلبي الكان صميم جابتلو فرة وخوفة

الشاعر محمد شريف العباسي :

وحات الحبو بتحتم علي اخفيهو
لا غنا لا شراب انا حري ما بطفيهو
الوجن المنرجسة والعج حافيهو
تلف قلبي بي موجات كهاربن فيهو

الشاعر احمد علي بشير :

جمالك يمشي زايد وكل يوم يتجدد
وطبعك فى سماحة وطيبة ما بتحدد
الخلاني لي شوفتك اتوق واتودد
كل ما تهفي لي صبري الجميل يتبدد

ويقول ايضاً :

كل ما تهفي لي مر الحناضل ابقو
وينك لي ياعجوة سبيطة دلقو
نارك تلعبت فى جوفي جوة تحرقو
الله براهو للمظلوم بينصف حقو
__________________
بضحك مع الزمن العنيد
وانسِف متاريس الطريق
واعرف متين أبقى المطر
وافهم متين اصبح حريق